Pushpa 2 Bookings : ఆ రికార్డులు ‘పుష్ప’ కే సొంతం..

Pushpa 2 Bookings All Time Records : పుష్ప అంటే ఫైర్ అనుకుంటివా.. కాదు.. వైల్డ్ ఫైర్ అంటూ ప్రేక్షకుల ముందుకు ‘పుష్ప ది రూల్’ రాబోతుంది. డిసెంబర్ 5న ప్రపంచ వ్యాప్తంగా ‘పుష్ప-2’ రిలీజు కానుంది. అయితే ఒకరోజు ముందుగానే డిసెంబర్ 4న రాత్రి 9:30 గంటలకు ప్రీమియర్ షోలు పడబోతున్నాయి. డిసెంబర్ 4 అమెరికాతోపాటు పలు దేశాల్లో స్క్రీనింగ్ మొదలుకానుంది. 

నార్త్ ఇండియాలో మాత్రం పుష్ప-2 డిసెంబర్ 5న ప్రేక్షకుల ముందుకు రానుంది. ఇటీవలే హిందీ పుష్ప-2 కోసం అడ్వాన్స్ బుకింగ్స్ మొదలయ్యాయి. ఈ సినిమాకు హిందీ ప్రేక్షకుల్లో ఎలాంటి అంచనాలు ఉన్నాయనేది ఇప్పటికే నమోదైన అడ్వాన్స్ బుకింగ్ చూస్తే అర్థమవుతోంది. పుష్ప-2 హిందీ వర్షన్ అడ్వాన్స్ బుకింగ్ మొదలైన కొద్ది నిమిషాల్లోనే బుక్ మై షో ద్వారా పదివేలకు పైగా టికెట్లు అమ్ముడైపోయాయి.

ఆన్ లైన్ ద్వారా మాత్రమే కాకుండా ఆఫ్ లైన్లో థియేటర్ల వద్దకు వెళ్లి క్యూలో నిలబడి మరీ పుష్ప-2 టికెట్లను హిందీ ప్రేక్షకులు కొనుగోలు చేశారు. 24గంటలు పూర్తి కాకుండానే రికార్డు స్థాయిలో పుష్ప-2 హిందీ టికెట్లు అమ్ముడు పోయాయని ఆ సినిమా డిస్ట్రిబ్యూటర్స్ చెబుతున్నారు.

బాహుబలి-2, కేజిఎఫ్-2 అడ్వాన్స్ బుకింగ్స్ ను దాటి మరి పుష్ప ది రూల్ అడ్వాన్స్ బుకింగ్ జరుగుతున్నట్టుగా సమాచారం.  రికార్డు స్థాయిలో పుష్ప-2 కి ఓపెనింగ్స్ దక్కాలని అంటే ఖచ్చితంగా ఉత్తరాదిన ‘పుష్ప-2’ భారీగా కలెక్షన్స్ రాబట్టాల్సి ఉంటుంది. మరోవైపు ఈ సినిమాకు అడ్వాన్స్ ల కిందనే ఇప్పటిదాకా సుమారు 40 కోట్లకు పైగా వచ్చినట్టు తెలుస్తోంది. 

ఒక హిందీ నుంచే దాదాపు 10కోట్లకుపైగా తొలిరోజు అడ్వాన్స్ బుకింగ్స్ కింద వచ్చాయి. ఓవరాల్ గా ఇండియా వ్యాప్తంగా తొలిరోజు 11వేలకు పైగా షోలు పడనున్నాయి. దీనిని బట్టి చూస్తే అనుకున్నట్టుగానే పెద్దమొత్తంలో అడ్వాన్స్ బుకింగ్ జరుగుతోంది. దీంతో తొలిరోజు అనుకున్న దాని కంటే ఎక్కువగానే వసూళ్లు వచ్చే అవకాశముంది నిర్మాతలు భావిస్తున్నారు. 

నార్త్ ఇండియాతోపాటు సౌత్ ఇండియాలో అడ్వాన్స్ బుకింగ్స్ అత్యధికంగా నమోదవుతున్నాయి. తొలిరోజు అత్యధిక వసూళ్లు సాధించిన సినిమాగా పుష్ప 2 నిలువాలంటే ఖచ్చితంగా నార్త్ ప్రేక్షకుల ప్రోత్సాహం చాలా అవసరం. పుష్ప 2 తొలిరోజు వసూళ్ళ రికార్డు కొన్నేళ్లపాటు కొనసాగే ఛాన్సులు ఉన్నాయి. బాలీవుడ్ లో ఏ సినిమాకు దక్కని ఓపెనింగ్స్ పుష్పకి దక్కే అవకాశాలు కన్పిస్తున్నాయి.

కేవలం హిందీ మార్కెట్లోనే పుష్ప-2 లాంగ్ రన్ లో రూ. 800 కోట్ల నుంచి వెయ్యి కోట్ల వసూళ్లు రాబట్టే అవకాశాలను కనిపిస్తున్నాయని సినీ విశ్లేషకులు అంచనా వేస్తున్నారు. విడుదలకు ముందే అనుహ్య రీతిలో అంచనాలు పెంచుతున్న పుష్ప రాజ్ విడుదల తర్వాత కూడా ఆ జోరు ఎంతవరకు చూపిస్తాడనేది మాత్రం వేచిచూడాల్సిందే..!